Со разговор со писателката Фросина Пармаковска за нејзината книга „Сè уште можам нешто да сторам“ утревечер во 19 часот во Градска библиотека „Браќа Миладиновци“ во Скопје ќе почне третиот циклус од кампањата „Читаме современи македонски автори“. Модератор ќе биде книжевната критичарка Александра Јуруковска, а фрагменти од романот ќе чита актерот Андреј Серафимовски.
Во библиотекаа до мај ќе бидат претставени осум македонски автори и исто толку дела. Кампањата ја задржува препознатливата структура: секој месец започнува со книга на месецот, првата седмица е разговорот со авторот, а последната – клубот на читатели.
– Претходните два циклуса ни се поттик и мотивација дека треба да продолжиме со истото темпо. Нашите библиотекари бележат зголемен интерес за македонските автори во сите наши објекти. Читателите ги бараат предложените книги, но и наслови што не се дел од кампањата. На разговорите имаме бројна публика, па и луѓе што претходно не доаѓале во библиотека. Добиваме голема поддршка од сите издавачи, од медиумите, од културната јавност. Добиваме одлични реакции од авторите дека се онаму каде што треба да бидат – на полиците и меѓу македонските читатели – вели Снежана Стојчевска, директорка на Библиотеката.
Книга за септември е „Сè уште можам нешто да сторам“ од Пармаковска, издание на „Или-Или“. Издавачите велат дека ова е роман за денешнината, за реалноста која е таква каква што ја гледаме, каква што ја живееме со сите недостатоци, предизвици и последици од стапиците што ни ги носи современото живеење.
– Како и во другите романи на Пармаковска, и во овој се доминантни психологизацијата на главниот и останатите ликови од една страна, но и личните подеми, падови и резултирачкиот раст, созревање на главниот лик од друга страна – велат од „Или-Или“.
Пармаковска е родена во Скопје, 1985 година. Дипломирала на Филолошки факултет, а магистрирала на Институт за македонска литература. Во 2013 година го објави романот „Пишувајќи ги изгубените топки“ („Култура“). Нејзиниот втор роман, „Вишнова хроника“ (2014, „Или-Или“) влезе во финале за наградата „Роман на годината“ на „Утрински весник“. „Одбројување“ е нејзин трет роман, за кој ја доби наградата „Роман на годината“ за 2017 година. Во 2018, ја доби наградата „Најсупешен автор“ што ја доделува МАИ. Во септември 2020 година излезе нејзиниот четврт роман „На враќање“ во издание на „Или-Или“. „Сè уште можам нешто да сторам“ е роман објавен во 2023 и е добитник на „Рациново признание“ за најдобра прозна книга за 2023 година. Член е на ДПМ од февруари 2018 година.
Кампањата „Читаме современи македонски автори“ започна во септември 2022 година како силна поддршка за современата македонска книжевност, за квалитетните дела, за издавачите и за македонскиот јазик. Досега беа претставени 16 автори и исто толку книги со жанровска разноликост: романи, раскази, репортажи, поезија. Кампањата е потсетување дека токму домашните читатели се тие што треба да ги читаат домашните автори. „Читаме современи македонски автори“ има препознатлив визуелен идентитет, инегриран пристап на социјалните медиуми, а од страна на Македонската асоцијација на издавачи беше наградена со признанието Промотор на читачката култура.
